Назад к списку

Нотфуллина Люция Вазифагыз: "Хәерле иртә!" тапшыруы алып баручысы, "Татарстан хәбәрләре" тапшыруы редакторы. Туган көнегез: 1979 елның 3нче августы, Казан Балачакта кем булырга теләгән идегез: балалар бакчасында тәрбияче Белемегез: югары - Татар дәүләт гуманитар-педагогика университеты Телевидениегә ничек эләктегез: студент чагымда могҗиза эзләп килгән идем, көне-төне чаба торган эшкә тап булдым. Иң яратканыгыз: көндәлек мәшәкатьтән арынып, кичләрен якын туганнар белән бергә утырып чәй эчәргә. Нәрсә ачуыгызны чыгара: кешеләрнең үз эшләренә салкын, бармак аша каравы Сезнеңчә, профессиональлек нәрсә ул: белем, теләк һәм мөмкинлекнең бергә кушылуы Хыялыгыз: җир тирәли сәяхәт  Тормыш максаты: быел машина йөртергә өйрәнү. Киләчәккә максатлар санап бетергесез. Ходай исәнлек бирсен! Тормышта иң зур уңышыгыз: мин сау-сәламәт килеш туганмын икән, моннан да зуррак бәхет юктыр дип саныйм. Яшәгән саен шуңа инанам. Күңелегезне төшергән иң зур нәрсә: инглиз теле белгечлеге буенча укыдым. Кызганыч, тәҗрибә булмагач, тел онытыла. Шуңа йөрәгем әрни. Мавыгуларыгыз: җәй көне җиләк җыю, кыш көне китап уку. Хәер, боларга вакыт елдан-ел әзрәк кала. Хәзер иң төп шөгылем - кызым, дип уйлыйм. Тормыш мәгънәсе:  үз эшеңдә чын профессионал булу, сау-сәламәт балалар үстерү. Гаилә хәле: кияүдә, 3 яшьлек кызым Илсөя үсә. Тормышның барлык очракларына да киңәшегез: бу тормышта сәламәтлектән дә кадерлерәк нәрсә юк. Шуны истә тотыгыз! "Татарстан – Яңа Гасыр" тамашачыларына теләкләрем… Бу тормыш диңгезендә югалып калмас өчен, һәрвакыт безнең дулкыннарда йөзегез!