Тугыз көн эчендә Казанда узган елның кышына караганда күбрәк кар яуган

Казанда тугыз көн эчендә, 27 гыйнвардан башлап, шәһәр урамнарыннан 222 мең тонна кар чыгарылган. Бу хакта шәһәр мэриясе матбугат хезмәте хәбәр итә.

Әлеге күрсәткечне узган елның кышында чыгарылган барлык кар күләме белән чагыштырып була – үткән кышта башкала урамнарыннан 238 мең тонна кар җыеп алынган.

Февральнең беренче көннәрендә генә дә айлык явым-төшем нормасының 53 проценты яуган.

Синоптиклар 7-9 февральдә дә бик күп кар явачак дип кисәтә.

Фото: kzn.ru