Республика Рәисе Рөстәм Миңнеханов ветераннар белән очрашты

Быел Җиңүнең 80 еллыгы. Россиядә - Ватанны саклаучылар елы. Ил мәнфәгатен төрле елларда яклаучылар кичә Казанга — опера театрына — төп бәйрәм тантанасына җыелды. Шулай ел саен, 9нчы май алдыннан Республика Рәисе Рөстәм Миңнеханов ветераннарыбыз белән очраша. Ел саен бәйрәм әле театрга кергәнче үк башланып китә. Монда Җиңүче әби-бабаларыбызны яшьләр сәламли. Бу — бәйрәм тантанасының үзенә күрә бер буыннар бәйләнеше.