14 июльдә Татарстанда сизелерлек салкынайтачак

Сишәмбе, 14 июльдә, Татарстанда һава температурасы сизелерлек түбәнәячәк. Яңгырлар көтелә — уртача, көчле яңгырлар, урыны белән яшенле яңгырлар да булырга мөмкин.

Аерым районнарда яшен, урыны белән боз явуы ихтимал. Кайбер урыннарда көньяк-көнчыгыштан искән җилнең тизлеге 15–20 м/с ка кадәр көчәячәк, дип кисәттеләр ТР Гидрометеоүзәгендә.

Сишәмбегә каршы төндә республика буенча һава температурасы +12…+17 градуска кадәр төшәчәк. Көндез +20…+25 градус көтелә.

Казанда алдагы төндә термометр баганалары +15…+17 градус күрсәтәчәк. Көндез башкалада һаваның максималь температурасы +22…+24 градус тәшкил итәчәк.

Фото: сгенерировано ИИ