Бүген Казан урамнарына бәйрәм трамвае чыга

Татарстан башкаласында 7 һәм 8 май көннәрендә «Җиңү трамвае» йөриячәк. 5 нче маршрут вагоны Бөек Ватан сугышы вакыйгаларына багышланган театр мәйданчыгына әвереләчәк. Бу хакта шәһәр мэриясе матбугат хезмәте хәбәр итә. 

Пассажирлар өчен «Сәйдәш» мәдәни үзәге артистлары чыгыш ясаячак, алар пассажирларны 1945 елның язына алып кайтачак. Тамашада казанлыларга һәм шәһәр кунакларына сугыш батырлыклары, авырлыклары һәм илебезнең халкын берләштергән Бөек Җиңү турында сөйләячәкләр.

Моннан тыш, вагонда сугыш еллары композицияләре яңгыраячак, пассажирлар таныш җырларга кушылып җырлый һәм бию номерларында катнаша алачак.

Бәйрәм трамваенда 7 майда 16:00 дан 20:00 гә кадәр һәм 8 майда 9:00 дан 13:00 кә кадәр күңел ачарга була.

Фото: Марат Мөгыйнов, kzn.ru