Биектауда гараж янгынында 84 яшьлек ир-ат һәлак булган

Биектаудагы 3нче Степная урамында шәхси гаражда янгын чыккан. Ут 12 квадрат метр мәйданны ялкынга чорнаган: бер катлы кирпеч корылма һәм аның эчендә булган «Тойота» автомобиле янып беткән.

Янгынны сүндергән вакытта коткаручылар 84 яшьлек ир-атның мәетен тапкан. Бу хакта ТР буенча Россия Гадәттән тыш хәлләр министрлыгының матбугат хезмәте хәбәр итте.

Янгын чыгу сәбәбе әлегә ачыкланмаган. Урынга тикшерүчеләр килгән.

Фото: МЧС РТ